اول مظاهرة

بحلم بارض طاهرة
من غير تزوير
او تعديل بدون رغبة
و عشان كده فكرت فى المظاهرة
وعشان اطمن حلمها
ضميته لحلمى الخايف
فقدرنا نروح اول مظاهرة
و القلب اسير سجن الخوف
و ماشيين فى البلد
نتمنى العمى ولا لحظة شوف
و كأنى ماشى فى غزة .. القدس
اى مكان غير وسط البلد
الكل واقف و مسلح
و صناديق خضرا جاهزة لرمي البنى ادمين
مبتفرقش بنت و ولد ولا مين و مين
و انا مسجون بتهمة خوف
و جريمتى كانت لكام سبب
اهلى عايزني و ملهمش ذنب
و وطن هيضيع و اولاده
و هى اللى خايف ياخدها حد
مكنتش عارف انا ليه بجد
قدرت اروح و عشان مين
بشوفلى دور عشان وطن
ولا عشان حستنى لازم اكون جنبها
انا عارف اني حلمي كان مدفون
و نبشه حلمها
و لولاها مكنتش رحت وحدى
و اول ما بدأوا الكناسين
لم البشر المغرضين
قلتلها يلا قبل ما الصندوق ياخدنا
مشينا بسرعة وهربنا
و رغم فرحة رجعتنا
كانت عيونا حزينة
من كترما شافت فى مظاهرتنا