هروب

سنين .. شهور
حتى الدقايق
بتفوت الدنيا
و تتدارى
و تتخبى
و تسيبنى اعيش
معرفش فين
لكنى عارف
انى مش عايش
انى مش فى الدنيا
حتى النفس مش هوا
ولا بتمتع باى شئ
كأن الدنيا بتدارى
خجلانة منى
مين فينا كان مقصر فى مين
خجلانة منى
لانك انتى مقصرة
عايشة و سايبانى
حياتى بايظة متبعترة
و لا انا اللى مش عايز اشوفك
اكمن عدت منى السنين متفرغة
لا عملتلك بيها حاجة
و لا كنتى بيا متمتعة
تعالى يا دنيا نتسامح
انا و انتى ندي و نتصارح
ما انتى قاعدة و انا رايح
لان فيكى بنى ادمين
اما انا يا ريتنى الحق
قبل اما اموت
اكون جوه واحد منهم

-------------------------------------
اول تأليف على الكيبورد بدون ورق وقلم

ونس

و فى وحدتى
عندى ونس
ازاى اقول وحدتى؟!
دماغى دايما بتشدنى
و حوارنا دايما مستمر
و ان سرحت عن فكرتى
عندى شمس جوه النهار
و الليل جميل ويا القمر
و ان كان فى شئ
و بنتظر
الناس روايات تتقرى
شايف الحدث
و مني ممكن تتحكى

و ان كنت وحدى
جوه بيتى
حواليا موجود الشوارع
و عندى كلام.. تلفزيونات
لكنه شئ يجيب الملل
و عندى الكتب دنيا جديدة
و ان كنت عايز اللى
يسمع منى كلامى
فأنا بسمعلى
و اتناقش
و الحيطان لها ودان
و يمكن معايا تتجرأ
و الاقيها كمان بلسان
ازاى اقول وحدتى
ازاى اقول وحدتى

حضن المخدة

ملقتش حضن
غير المخدة
حضنى دايما مفتوح لها
و منمش غير بضمها
بحبها
اه عشان محتاجلها
و اكمنها راضية


جربت تحضن؟؟
كان نفسى احضن
لكن مكنش غير المخدة
كان نفسى حد يضمنى
حد اهمه و يهمنى
حتى المخدة
مبتحضنيش!!

كان نفسى اعرف
الاحساس
بحضن الناس
كان نفسى اعرف
الاحتواء
لكن مفيش
غير المخدة
ارجعلها
دايما ترضى